– Velkomen etter

1998 var året då dåverande statsminister Kjell Magne Bondevik oppretta Verdikommisjonen, eks-statsminister Gro Harlem Brundtland blei verdshelsedoktor, Norge rauk ut av fotball-VM etter Italia-tapet og Frank Sinatra tok med seg «My Way» i grava.

KrP-toppen Lars Gunnar Lie gjekk også sin eigen veg:

– Å, det forslaget, ja, det hugsar eg godt, og særleg framsida i VG – og leiaren, seier Lie i dag.

Lie, som var leiar av Stortingets mektige finanskomité, ville ta frå kvarmann taxfree-kvota. Av edruskapsomsyn burde ikkje folk få kjøpe billeg alkohol på utanlandsturar.

– Fekk du kjeft, Lie?

– Om eg gjorde. Det vanka mange sterke reaksjonar.

LES OGSÅ: Taxfree for fall

«Gledesløs»

Norges største avis plasserte Lie og forslaget på framsida. På leiarplass fortalde VG KrF-Lie kvar David kjøpte ølet:

«Nå får det være nok! Forslaget fra KrF-toppen Lars Gunnar Lie om å avskaffe taxfree-handelen er enda et eksempel på gledesløs politisk tenkning i Kristelig Folkeparti (...) Vi tror folk flest vil ha seg frabedt slikt humørløst formynderi.»

– Eg, seier Lie i dag, eg tok berre fram KrFs politikk. Men fordi eg var leiar av finanskomiteen, blei det slått stort opp i VG. Eg blei skulda for å ta gleda frå folk.

LES OGSÅ: Drikkemønster i endring

Utgått på dato

Snart ein mannsalder seinare ser VG heilt annleis på saka:

«Ideen om at folk som reiser med fly til og fra utlandet skal kunne kjøpe billig sprit, er utgått på dato (...) Et argument for å opprettholde det avgiftsfrie alkoholsalget, er at Avinors leieinntekter omfordeles til drift av det såkalte kortbanenettet. Det er en eiendommelig idé at billig brennevin skal subsidiere norsk flytrafikk.»

– Velkomen etter, ler den pensjonerte stortingsrepresentanten. Han sat 16 år på Tinget og fekk eit år som samferdselsminister i Syse-regjeringa.

Bakgrunnen for VGs rundsnuing er at Arbeidarpartiet og eit helseutval leia av eks-leiar av Finanskomiteen, Torgeir Micaelsen, no går inn for å avvikle ordninga med at du kan bere med deg heim posar med avgiftsfrie, flytande landbruksprodukt.

– Sjølvsagt burde Arbeidarpartiet fjerna ordninga medan dei styrte Norge i åtte år. Men det er flott at dei har kome fram til at Norge må avvikle taxfree-handelen, til liks med resten av Europa. Så det er berre å seie «velkomen etter».

LES OGSÅ: Høie: Taxfree-endringer kan utfordre polets framtid

Følg oss på Facebook og Twitter!

Støtte i folket

Folket er også samde: 54 prosent svara ja til taxfree-kutt i ei Klassekampen-måling før jul.

Men: Skal så skje, må prisane på Vinmonopolet ned, sa folket i same måling.

Ikkje noko problem, meiner polstyrar Kai Henriksen. Dersom halvparten av taxfree-salet går til Vinmonopolet kan prisen på ei flaske vin gå ned med 15 kroner i snitt.

Før jul valsa Stortings-fleirtalet over dei blåblå og kravde ei utgreiing om taxfree-salet på flyplassane. Mål: Overføre salet til Vinmonopolet.

– Eg trur taxfree-salet står for fall. Det er berre Høgre og Frp som ønskjer dagens ordning, seier generalsekretær Mina Gerhardsen i Actis.

– Kvifor ser vi ei haldningsendring i synet på taxfree?

– Forklaringa er omfanget. Det som skulle vere ein liten ventil er blitt ei vidopen dør. Regjeringas siste utviding av taxfree-kvota provoserte mange, og på flyplassane er alkoholsalet blitt altfor påtrengjande, forklarar Gerhardsen.